சிக்கிம் வெள்ளத்தில் 27 பேர் உயிரிழப்பு: 142 பேர் மாயம்!

சிக்கிமில் ஏற்பட்ட திடீர் வெள்ளத்தில் சிக்கி உயிரிழந்தோர் எண்ணிக்கை 27-ஆக அதிகரித்துள்ளது. இதில் 7 பேர் ராணுவ வீரர்களாவர்.

சிக்கிம் மாநிலத்தில் அக்.3-ம் தேதி லோனாக் ஏரிப் பகுதியில் அதிகாலை மேக வெடிப்பால் அதீத கனமழை பெய்தது. இதையடுத்து, தீஸ்தா ஆற்றில் வெள்ளப்பெருக்கு ஏற்பட்டு, சுங்தாங் பகுதியில் உள்ள நீர்மின் திட்ட அணை உடைந்தது. இதனால், மங்கன், கேங்டாக், நாம்சி, பாக்யாங் ஆகிய 4 மாவட்டங்கள் வெள்ளக்காடாக மாறின.

இந்த திடீர் வெள்ளத்தில் 1,200-க்கும் மேற்பட்ட வீடுகள் சேதமடைந்து 25,000-க்கும் மேற்பட்ட மக்கள் பாதிக்கப்பட்டுள்ளனர். இதுவரை 2,413 பேர் மீட்கப்பட்டுள்ளனர்.

வெள்ளத்தில் சிக்கி இதுவரை 27 பேர் உயிரிழந்துள்ளனர். இதில் 7 ராணுவ வீரர்களும் அடக்கும். 23 ராணுவ வீரர்கள் உட்பட 142 பேரை தேடும் பணி இன்னும் நடந்து வருவதாக அரசு அதிகாரிகள் தெரிவித்தனர்.

நிவாரண முகாம்களில் 6,875 பேர் தங்க வைக்கப்பட்டுள்ளனர். மாநிலத்தில் 22 நிவாரண முகாம்களை அரசு அமைத்துள்ளது.