கள்ளக்காதல் விவகாரத்தில் வாலிபர் தலை துண்டித்து கொலை

நெல்லை மாவட்டம் தாழையூத்து அருகே உள்ள குறிச்சிகுளம் கிராமத்தை சேர்ந்தவர் வெள்ளியப்பன் (32). இவர் இன்று மதியம் அப்பகுதியில் உள்ள தெருவில் நடந்து சென்று கொண்டிருந்தார். அப்போது அவரை வழிமறித்த மர்ம நபர்கள் அரிவாளால் தலை துண்டித்து கொலை செய்து விட்டு தப்பி ஓடி விட்டனர். இந்த சம்பவம் அப்பகுதியில் பெரும் பரபரப்பு ஏற்படுத்தியது.

இது குறித்து தகவல் அறிந்த தாழையூத்து போலீசார் சம்பவ இடத்திற்கு விரைந்து வந்து கொலை செய்யப்பட்ட வெள்ளியப்பன் உடலை மீட்டு பிரேத பரிசோதனைக்காக நெல்லை அரசு மருத்துவமனைக்கு அனுப்பி வைத்தனர்.

இச்சம்பவம் குறித்து விசாரணை நடத்தியதில் கொலையுண்ட வெள்ளியப்பன் திருமணமான பெண்ணுடன் தகாத உறவு வைத்திருந்த விவகாரத்தில் கொலை செய்யப்பட்டிருப்பது தெரியவந்தது. தொடர்ந்து போலீசார் வழக்கு பதிந்து கொலையாளிகள் யார் என தீவிரமாக தேடி வருகின்றனர்.