லஞ்சம் வாங்கியபோது சிக்கிய அதிகாரி மாடியிலிருந்து குதித்து தற்கொலை..!

குஜராத் மாநிலம் ராஜ்கோட்டில் வெளிநாட்டு வர்த்தக இயக்குநரகத்தில் இணை-இயக்குனராக பணியாற்றி வருபவர் ஜவ்ரி மல் பிஷோனி (வயது 44). உணவு பெட்டிகளை ஏற்றுமதி செய்ய அனுமதிக்கும் சான்றிதழ் தொடர்பாக தொழிலதிபர் ஒருவரிடம் 9 லட்ச ரூபாய் லஞ்சம் கேட்டுள்ளார்.

முதல்கட்டமாக 5 லட்ச ரூபாய் லஞ்சம் பெற்றுள்ளார். அப்போது, பிஷோனியை சிபிஐ அதிகாரிகள் கையும் களவுமாக கைது செய்தனர். நேற்று இரவு முழுவதும் பிஷோனியின் அலுவலகத்தில் சிபிஐ அதிகாரிகள் அதிரடி சோதனை மேற்கொண்டனர்.

இரவு முழுவதும் நடைபெற்ற சோதனை இன்று காலை 9 மணியளவில் நிறைவடைந்தது. இதையடுத்து லஞ்ச புகாரில் பிஷோனியை கைது செய்ய முயன்ற போது அவர் அலுவலகத்தின் 4-வது மாடியில் இருந்து கீழே குதித்தார்.

படுகாயமடைந்த அவரை மருத்துவமனைக்கு கொண்டு செல்லப்பட்டு அவருக்கு சிகிச்சை அளிக்கப்பட்டது. ஆனால் அவர் சிகிச்சை பலனின்றி உயிரிழந்தார். இந்த சம்பவம் தொடர்பாக போலீசார் வழக்குப்பதிவு செய்து விசாரணை செய்து வருகின்றனர்.