தமிழ் சினிமாவில் காமெடி நடிகராக இருந்து, தற்போது ஹீரோவாக மாறியிருப்பவர் சூரி. இவர், விடுதலை, கருடன் ஆகிய இரண்டு வெற்றிப் படங்களை கொடுத்துள்ளார். மேலும், இவரது நடிப்பில் உருவாகியுள்ள, பல சர்வதேச விருதுகளை வென்றுள்ள கொட்டுக்காளி திரைப்படம், வரும் வெள்ளிக் கிழமை அன்று ரிலீஸ் ஆக உள்ளது.
இதுமட்டுமின்றி, விடுதலை 2-ஆம் பாகமும், ரிலீஸ்-க்கு தயாராகி வருகிறது. இவ்வாறு பல்வேறு படைப்புகளின் மூலம், பிசியாக இருக்கும் நடிகர் சூரி, விலங்கு வெப் தொடரை இயக்கிய பிரசாந்த் பாண்டிராஜ் இயக்கும் அடுத்த படத்தில் நடிக்க இருப்பதாக கூறப்பட்டது.
இந்த தகவலை அறிந்த ரசிகர்கள், உற்சாகம் அடைந்திருந்தனர். இந்நிலையில், இதுதொடர்பான அறிவிப்பு, தற்போது அதிகாரப்பூர்வமாகவே வெளியிடப்பட்டுள்ளது.
மேலும், கருடன் படத்தை தயாரித்த அதே தயாரிப்பாளர் தான், இந்த படத்தையும் தயாரிக்க உள்ளார். மற்ற நடிகர்கள், நடிகைகள், தொழில்நுட்ப கலைஞர்களின் விவரங்கள், விரைவில் வெளியிடப்படும் என்றும் படக்குழு தரப்பில் தெரிவிக்கப்பட்டுள்ளது.