சென்னை புறநகர் ரயில் சேவைகள் இன்று மாற்றம்!

சென்னை புறநகர் ரயில் சேவைகளில் பராமரிப்புப் பணி காரணமாக இன்று (ஜூலை 30) மாற்றம் செய்யப்பட்டுள்ளது.

இது குறித்து தெற்கு ரயில்வே சார்பில் வெளியிடப்பட்ட செய்திக் குறிப்பு:

சென்னை சென்ட்ரலிலிருந்து காலை 9.35 மணிக்குச் செல்லும் திருவள்ளூா் மின்சார ரயில் (எண்: 43219), காலை 10 மணிக்குச் செல்லும் திருத்தணி மின்சார ரயில் (எண்: 43507), காலை 10.30 மணிக்குச் செல்லும் கடம்பத்தூா் மின்சார ரயில் (எண்: 43901), காலை 11 மணிக்குச் செல்லும் அரக்கோணம் மின்சார ரயில் (எண்: 43411) இன்று (ஜூலை 30) பட்டாபிராம், நெமிலிச்சேரி, வேப்பம்பட்டு, செவ்வாப்பேட்டை ரோடு ஆகிய நிறுத்தங்களில் நிற்காமல் செல்லும்.

அதேபோல், காலை 9.05 மணிக்கு வேளச்சேரிலிருந்தும், காலை 9.55 மணிக்கு சென்னை கடற்கரையிலிருந்தும் திருவள்ளூா் செல்லும் மின்சார ரயில்கள் (எண்: 43763, 43705) இன்று (ஜூலை 30) பட்டாபிராம், நெமிலிச்சேரி, வேப்பம்பட்டு, செவ்வாப்பேட்டை ரோடு ஆகிய நிறுத்தங்களில் நிற்காமல் செல்லும் எனத் தெரிவிக்கப்பட்டுள்ளது.